ភ្នំពេញ: បងប្រុសរបស់នាយករដ្ឋមន្ត្រីកម្ពុជាលោក ហ៊ុន សាន ត្រូវបានចូលកាន់តំណែងជារដ្ឋលេខាធិការក្រសួងសាធារណការជាផ្លូវការនៅ ថ្ងៃសុក្រ ទី២៤ ខែមិថុនា ឆ្នាំ២០២២នេះ។

ពិធីប្រកាសចូលកាន់មុខតំណែងលោក ហ៊ុន សាន ជារដ្ឋលេខាធិការក្រសួងសាធារណការនិងដឹកជញ្ជូន បានប្រព្រឹត្តទៅក្រោមអធិបតីភាពលោកទេសរដ្ឋមន្ត្រី ស៊ុន ចាន់ថុល។

ថ្លែងទៅកាន់អង្គពិធីនាឱកាសនោះ លោកទេសរដ្ឋមន្ត្រី បានថ្លែងអំណរគុណដល់ គុណបំណាច់របស់លោក ហ៊ុន សាន ដែលបានខិតខំប្រឹងប្រែងបម្រើការជូនក្រសួងសាធារណការ និងដឹកជញ្ជូន អស់រយៈពេលជាយូរកន្លងមក ប្រកបដោយស្មារតីទទួលខុសត្រូវខ្ពស់ ជាផលប្រយោជន៍ ដល់ក្រសួង និងប្រទេសជាតិទាំងមូល។

បន្ទាប់ពីបានអាន និងប្រគល់ព្រះរាជក្រឹត្យជូនលោក ហ៊ុន សាន ដែលត្រូវបានតែងតាំងជារដ្ឋលេខាធិការ លោកទេសមន្ត្រី បានជូនកន្ត្រកផ្កា និងបានថ្លែងជូនពរសព្ទសាធុកាពរ ជូនចំពោះឯកឧត្តមរដ្ឋលេខាធិការ សូមឱ្យមានសុខភាពមាំមួន អាយុយឺនយូរជាម្លប់ដល់កូនចៅ គ្រួសារ និងមន្ត្រីក្រោមឱវាទ និងប្រកបដោយសេចក្តីសុខសេចក្តីចម្រើន និងពុទ្ធពរទាំង៤ប្រការ កុំបីឃ្លៀង ឃ្លាតឡើយ។

សូមជម្រាបជូនថា លោក ហ៊ុន សាន ត្រូវជាបងប្រុសបង្កើតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កន្លងលោកបានបម្រើការជាទីប្រឹក្សារបស់ ក្រសួងសាធារណការនិងដឹកជញ្ជូន មានឋានៈស្មើរដ្ឋលេខាធិការ។ ដោយយល់ឃើញពីការខិតខំប្រឹង ប្រែងរបស់លោក ទេសរដ្ឋមន្ត្រី ស៊ុន ចាន់ថុល បានដាក់សំណើរដ៏ខ្ពង់ខ្ពស់គោរពជូនសម្ដេច តេជោស្នើរសុំតែងតាំងឯកឧត្តម ហ៊ុន សាន ជារដ្ឋលេខាធិការរបស់ក្រសួង ដើម្បីតបស្នង នឹងកិច្ចខិតខំប្រឹងប្រែងបំពេញការងារជូនក្រសួង៕